Hindi lang bida sa pelikula si Tom Cruise—bida rin siya sa totoong buhay! Muling kinilala ang Hollywood action star ng Guinness World Records matapos niyang itala ang “pinakamaraming burning parachute jumps ng isang tao.”
Ginawa ni Cruise ang nakakabaliw na stunt na ito habang ginagawa ang “Mission: Impossible – The Final Reckoning.” Sa climactic scene ng pelikula, tumalon siya mula sa isang biplane gamit ang parachute na sinadyang basain ng gasolina at saka sinilaban sa ere—hindi lang isang beses, kundi 16 na beses!
Galing ang bawat talon sa taas na mahigit 7,000 feet. Pagkatapos ng bawat take, kinakalas ni Cruise ang sunog na parachute at kinakaladkad palabas ang backup para ligtas na makalapag. Tatlong segundo lang ang itinatagal ng apoy bago tuluyang matunaw ang parachute—kaya wala talagang room for error.
Ayon kay GWR editor-in-chief Craig Glenday, hindi lang gumaganap ng action hero si Tom Cruise—isa talaga siyang action hero. Aniya, “Hindi lang ito tungkol sa kasikatan—kundi sa dedikasyon niya sa pagiging authentic at sa pag-test ng physical limits ng isang aktor.”
Bonus record? Si Cruise rin ang may hawak ng “pinakamaraming magkasunod na pelikulang kumita ng $100 milyon,” mula 2012 hanggang sa kasalukuyang Mission: Impossible installment.
Mula fighter jets, nakamamatay na stunts, hanggang sa pagligtas ng sinehan sa panahon ng pandemya—imposible ba talaga para kay Ethan Hunt? Mukhang hindi.