Mainit na sinalubong ng mga tagahanga sa Beijing ang Oscar-nominated actor na Timothée Chalamet habang isinusulong niya sa Asia ang pelikulang Marty Supreme ilang araw bago ang Academy Awards.
Sa pelikula, ginagampanan ni Chalamet ang isang table tennis champion noong 1950s na may matinding ambisyon. Ang proyekto, na idinirehe ni Josh Safdie, ay naging hindi inaasahang global hit matapos ang viral promotion ng aktor.
Sa red carpet event sa Beijing, kinatuwaan ng fans si Chalamet matapos niyang purihin ang Chinese table tennis star na si Sun Yingsha, na tinawag niyang “kamangha-manghang manlalaro.” Bago ito, bumili pa siya ng poster ng world champion sa isang lokal na tindahan. Ilang taon ding nag-ensayo ng table tennis ang aktor bilang paghahanda sa kanyang papel.
Dumagsa rin ang mga tagahanga para sa autograph at selfie ng aktor, na kilala sa China sa palayaw na “tiancha” o “sweet tea.” Kilala si Chalamet sa mga pelikulang Dune at Call Me By Your Name, at may malaki na rin siyang fan base sa bansa.
Ang pagbisita ng aktor ay bahagi ng pagsisikap ng Hollywood na palakasin ang presensya nito sa malaking merkado ng China, na nakapagtala ng humigit-kumulang 51.8 bilyong yuan sa ticket sales noong nakaraang taon.
Matapos ang stops sa Japan at Chengdu kung saan nakita siyang naglalaro ng table tennis kasama ang mga lokal, inaasahang ipapalabas ang Marty Supreme sa mga sinehan sa China sa Marso 20.