Nilinaw ni Gilas Pilipinas head coach Tim Cone na wala muna siyang planong palawakin ang training pool ng kanyang A-Team, kahit pa humanga siya sa Gilas squad na nag-uwi ng gold medal sa nakaraang Southeast Asian Games sa Bangkok.
Ayon kay Cone, may mga manlalaro mula sa SEA Games lineup—tulad nina Robert Bolick, Ray Parks Jr., Thirdy Ravena at Matthew Wright—na puwedeng bumagay sa A-Team. Gayunman, iginiit niyang mahalagang manatiling maliit at buo ang core ng koponan dahil sa siksik na iskedyul ng PBA, overseas leagues, at FIBA tournaments.
“May 12 lang na puwesto,” paliwanag ni Cone, na mas pinipiling tutok sa isang matatag at sanay na grupo kaysa sa malaking pool na mahirap ihanda sa limitadong panahon.
Mula nang italaga bilang permanent head coach, iniwan ni Cone ang tradisyunal na malawak na lineup at bumuo ng isang 12-man core na pinamumunuan nina Justin Brownlee, June Mar Fajardo, Kai Sotto at Dwight Ramos. Kasama rin ang mga beterano at rising stars na naghahanda para sa malalaking torneo tulad ng FIBA Asia, World Cup Qualifiers at 2026 Asian Games.
Para kay Cone, ang diskarte ay simple: mas maliit na grupo, mas malinaw na chemistry—isang mahalagang hakbang sa pangmatagalang layunin ng Gilas na makapasok sa 2028 Los Angeles Olympics