Nagliyab si Shai Gilgeous-Alexander sa Game 7 matapos magtala ng 35 puntos para sa Oklahoma City Thunder na nagpaulan ng puntos sa 125-93 na panalo kontra Denver Nuggets, Lunes ng umaga (oras sa Maynila). Dahil dito, pasok na ang Thunder sa Western Conference Finals kung saan makakatapat nila ang Minnesota Timberwolves.
Matapos ang dikit na serye, biglang bumaligtad ang ihip ng hangin sa deciding game—at buong lakas itong sinamantala ng top-seeded Thunder para kunin ang 4-3 panalo sa serye.
“Masarap sa pakiramdam, pero hindi pa ’yon ang ultimate goal namin,” ani Shai. “Kailangan muna naming daanan ang Timberwolves para makarating sa NBA Finals.”
Kasama si Jalen Williams na bumuhos ng 24 puntos, bumigay ang Denver sa dami ng errors—23 turnovers na ginawang 37 puntos ng Thunder. Si Nikola Jokic ang nanguna sa Nuggets na may 20 puntos, habang may tig-19 at 13 sina Christian Braun at Jamal Murray.
Ang Nuggets ay maganda ang simula—lamang pa ng 11 points sa first quarter—pero bumagsak ang momentum sa second quarter kung saan nilampaso sila ng OKC, 39-20.
Si Jalen Williams ay sumiklab sa second quarter pa lang, may 17 puntos mula sa 8-of-11 shooting. Pagpasok ng third quarter, lalo pang lumobo ang lamang habang patuloy ang pressure ng Thunder. Umabot pa sa 43-point lead ang OKC bago nila pinatay ang laro.
Sa kabilang panig, aminado ang interim head coach ng Denver na si David Adelman: “’Yung turnovers talaga ang pumatay sa amin. Hindi ka mananalo ng playoff game kung ibinibigay mo sa kalaban ang ganyang karaming puntos mula sa sariling pagkakamali.”