Kahit suspendido ng Ombudsman, maaari pa ring tumakbo bilang kongresista ng unang distrito ng Marikina si Mayor Marcelino Teodoro, ayon sa Commission on Elections (Comelec).
Ayon kay Comelec Chairman George Garcia, walang epekto sa kandidatura ni Teodoro ang anim na buwang suspension order mula sa Ombudsman kaugnay ng umano’y maling paggamit ng P130 milyong PhilHealth funds.
“Hangga’t walang pinal na hatol mula sa korte, mananatili siyang kandidato at hindi matatanggal sa balota,” paliwanag ni Garcia.
Gayunman, inamin niyang maaaring makaapekto sa kampanya ni Teodoro ang nasabing isyu.
Bukod kay Teodoro, kasama sa suspendido sina Vice Mayor Mario Andres, ilang miyembro ng city council, at iba pang opisyal ng Marikina.
Samantala, mahigpit na binabantayan ng pulisya ang sitwasyon sa lungsod, ngunit ayon kay Eastern Police District director Col. Villamor Tuliao, nananatiling payapa ang Marikina at wala pang protesta mula sa kampo ni Teodoro.