Handa na ba kayo, Swifties? Sa Biyernes ng hatinggabi (alas-12:01 ng umaga ET, o pasado tanghali sa Pilipinas), ilalabas na ni Taylor Swift ang pinakabagong album niyang The Life of a Showgirl.
Ito ang ika-12 studio album ng 35-anyos na pop superstar, na inspirado sa kanyang record-breaking Eras Tour na kumita ng higit $2 bilyon (P116 bilyon). Bukod sa bagong musika, abala rin ang fans sa “Portofino orange” theme ng era na ito—mula sa outfits hanggang sa mga release parties sa iba’t ibang bansa.
Ayon kay Swift, ang Showgirl ay galing sa “pinakamasaya at pinaka-wild” na yugto ng kanyang buhay, lalo na’t engaged na siya kay NFL star Travis Kelce at nabawi na rin ang karapatan sa buong back catalog ng kanyang mga kanta. Inaasahan ng fans na magiging puno ng pop “bangers” ang album dahil muli siyang nakipag-collab sa hitmakers na sina Max Martin at Shellback, ang tandem sa likod ng “Shake It Off” at “22.”
Hindi rin mawawala ang mga “Easter eggs” na matagal nang kinahuhumalingan ng kanyang fans—mga clue sa kanta o album art na naglalantad ng susunod niyang proyekto o mga detalye sa kanyang personal na buhay.
Bukod sa digital release, may mga special edition vinyl din gaya ng Portofino orange glitter at summertime spritz pink shimmer. Kasabay nito, may one-off film event sa mga sinehan na posibleng kumita ng hanggang P2.9 bilyon.
Dagdag sorpresa, makakasama rin sa title track ang rising pop star na si Sabrina Carpenter.
Kung dati ay nakilala si Swift sa mga introspective albums tulad ng Folklore, Evermore, at Tortured Poets Department, ngayong Showgirl era naman, asahan ang mas makukulay, upbeat at glam na tunog—isang panibagong yugto na siguradong ikatutuwa ng kanyang fans sa buong mundo.