Inutusan ni Transportation Secretary Vivencio “Vince” Dizon ang Land Transportation Franchising and Regulatory Board (LTFRB) at Land Transportation Office (LTO) na i-revoke ang lisensya ng isang taxi driver at ang prangkisa ng operator matapos mahuli sa viral video na naniningil ng P1,260 para sa biyahe mula NAIA Terminal 3 papuntang Terminal 2.
Ayon kay Dizon, galit na galit siya nang makita ang video at agad niyang pinadalhan ng show cause order ang driver, pero sinabihan rin niya ang LTFRB at LTO na tanggalin na agad ang lisensya ng driver at prangkisa ng operator.
Sa video, makikitang sinabing susundin ng driver ang taxi meter pero sa halip ay ipinakita niya ang screen ng cellphone na may halagang P1,200. Ang distansya ng dalawang terminal ay 8.4 kilometro lang at karaniwang aabot ng 22 minuto ang biyahe, kaya nagulat ang mga pasahero sa mataas na singil.
Ayon sa isa sa mga pasahero, wala silang kontrata at inexpect nilang hindi lalagpas ng P500 ang pamasahe. Ngunit nagbayad sila ng P1,145 na kasama na ang toll fee dahil nagmamadali silang hindi ma-late sa flight.
Nasakote na ng LTO ang taxi unit ng operator na Taxi Hub Transport. Sinabi naman ng manager ng Taxi Hub na hindi sila nagbibigay ng fixed rates at mahigpit nilang ipinagbabawal ang kontrata sa kanilang mga driver. Nangyari na rin raw dati ang ganitong kaso kaya nagbigay sila ng disciplinary action sa mga driver.
Hinimok ni Secretary Dizon ang publiko na huwag matakot mag-report ng mga taxi driver na naniningil nang sobra. Pinayuhan din niyang gamitin na lang pansamantala ang mga transport network vehicle service (TNVS) o ride-hailing apps para maiwasan ang pang-aabuso.
“Kung may makita kayo, i-video niyo, i-tag ang DOTr at LTO para aaksyunan namin agad,” sabi niya. “Ito lang ang paraan para matakot na ang mga taxi driver na matagal nang nananamantala.”