Nakahanay nang maupo si Tarlac City Vice Mayor Katherine Therese Angeles bilang bagong alkalde ng lungsod matapos madiskuwalipika si Mayor Susan Yap-Sulit dahil sa isyu ng residency, ayon sa Commission on Elections (Comelec).
Ayon kay Comelec Chairman George Garcia, kasalukuyang inihahanda ng komisyon ang certificate of finality at entry of judgment na magpapatibay sa desisyon laban kay Sulit. Kapag naging pinal ito, awtomatikong papalit si Angeles bilang alkalde.
Wala pang inilalabas na temporary restraining order (TRO) mula sa Korte Suprema na maaaring pumigil sa pagpapatupad ng desisyon.
Binigyang-diin ni Garcia na hindi maaaring balewalain ang batas kahit nanalo si Sulit sa halalan.
“Ang kalooban ng taumbayan ay hindi maaaring manaig laban sa tuntunin ng batas,” aniya.
Si Sulit ay idineklarang hindi kuwalipikado sa pagtakbo bilang alkalde dahil sa kakulangan sa paninirahan sa Tarlac City, na isang pangunahing rekisito para sa kandidatura.