Papasok ang mga sikat na pelikula ng Studio Ghibli sa mga sinehan sa Southeast Asia, kabilang ang Pilipinas, sa loob ng susunod na limang taon, matapos pumasok ang studio sa isang kasunduan sa mm2 Entertainment na nakabase sa Singapore.
Kasama sa deal ang 21 pelikula ng Studio Ghibli, kabilang ang mga obra ni Hayao Miyazaki tulad ng Spirited Away, Howl’s Moving Castle, at My Neighbor Totoro.
Mapapanood ang mga pelikula sa Singapore, Malaysia, Brunei, Indonesia, Thailand, Cambodia, at Pilipinas. Ayon kay Chang Long Jong, CEO ng mm2 Asia Group, ang mga pelikulang ito ay kilala sa husay ng animation, kwento, at emosyonal na hatak. Layunin nilang ipakilala ang mga klasiko sa bagong henerasyon ng mga tagahanga.
Noong nakaraan, malaking tagumpay din ang muling pagpapalabas ng mga pelikula ni Miyazaki sa mainland China, na nagdala ng daan-daang milyong dolyar na kita.