Pormal na ang balik-ensayo! Kasama na muli ni Manny Pacquiao ang dati niyang strength and conditioning coach na si Justin Fortune bilang paghahanda sa pagbabalik sa ring kontra WBC welterweight champ Mario Barrios sa Hulyo 19 sa MGM Grand, Las Vegas.
Si Fortune, na matagal nang katuwang ni Pacquiao sa mga laban niya noon, ay muling nag-report sa training camp ni Manny sa Los Angeles. Ayon sa kanya, handa siyang ihanda si Pacquiao—na ngayon ay 46 anyos—para sa matinding laban kontra sa mas batang si Barrios (30 anyos, 5’9”).
Pagkarating pa lang sa LA, agad nang nagtungo si Pacquiao sa Wild Card Gym para sa magaan na ensayo kasama ang longtime coach na si Freddie Roach. Jetlag? Walang atrasan si Manny.
Sabi ni Fortune, kahit may edad na si Pacquiao, nasa kanya pa rin ang bilis, bagama’t natural na may konting bagal kumpara sa dati. “Hindi na siya 25, pero mabilis pa rin,” ani Fortune.
Layunin ni Pacquiao na lampasan ang sarili niyang rekord—ang pagiging pinakamatandang welterweight world champion, na una niyang naabot noong 2019 matapos talunin si Keith Thurman sa edad na 40.
Ngayong balik na sa ensayo si Manny, asahan ang isa na namang makasaysayang laban mula sa Pambansang Kamao.