Good news para sa mga SSS pensioners! Simula ngayong Setyembre, tataas na ang buwanang pensyon — bahagi ng kauna-unahang 3-year pension increase program ng Social Security System (SSS) na tatagal hanggang 2027.
Inanunsyo ng SSS noong Hulyo 31 na aprubado na ang Resolution 340 ng Social Security Commission, na layuning tugunan ang matagal nang hiling ng mga pensioner na dagdagan ang kanilang natatanggap habang pinananatiling matatag ang pondo.
Sino ang makikinabang?
Mahigit 3.8 milyong pensioners ang sakop ng bagong scheme:
- 2.6 milyon ay retirement at disability pensioners
- 1.2 milyon ay survivor o death pensioners
Gaano kalaki ang increase?
Magsisimula ito bawat Setyembre sa loob ng tatlong taon:
- 10% increase bawat taon para sa retirement at disability pensioners
- 5% increase bawat taon para sa survivor pensioners
Halimbawa:
Kung tumatanggap ka ng ₱2,200, magiging ₱2,420 ito sa 2025.
Sa 2026, aakyat ito sa ₱2,662, at sa 2027, magiging ₱2,928.20.
Dahil compounding ang increase, lumalaki rin ang aktwal na dagdag kada taon.
May catch ba?
Wala! Hindi kailangan ng dagdag kontribusyon. Kabaligtaran ito ng P1,000 across-the-board hike noong 2017 na humantong sa mas mataas na hulog. Pero para makasama sa yearly increase, dapat active pensioner ka as of August 31 ng bawat taon.
Ayon kay SSS President and CEO Robert de Claro, ang programang ito ay bunga ng actuarial review at gabay ng DOF Sec. Ralph Recto. Layunin nitong tulungan ang mga pensioner na makabawi sa epekto ng inflation at mapanatili ang dignidad ng kanilang pamumuhay.
Tinatayang ₱92.8 bilyon ang maidaragdag sa ekonomiya sa loob ng tatlong taon mula sa dagdag-pensyon na ito.
Mas mataas na pensyon, walang dagdag hulog — tunay na panalong balita para sa mga senior!