Kinumpirma ni Senate President Vicente “Tito” Sotto III na may mga kumakalat na usap-usapan ukol sa panibagong tangkang pagpapatalsik sa kanya bilang pinuno ng Senado, bagama’t tinawag niya itong karaniwang pangyayari sa pulitika ng mataas na kapulungan.
Ayon kay Sotto, nakarating sa kanya ang mga ulat mula mismo sa loob ng Senado nitong nagdaang weekend, at kumpiyansa umano ang mga nagbigay ng impormasyon.
“Naririnig na namin ‘yan paminsan-minsan. Karaniwan na ‘yan,” ani Sotto. “May isa o dalawang kuwento lang na may nag-o-orchestrate, pero hanggang doon lang.”
Dagdag pa ng Senate President, nasa mga kapwa senador niya ang pagpapasya kung mananatili pa siyang lider ng Senado, dahil nakasalalay ito sa tiwala ng mayorya.
Ang mga balitang ito ay lumitaw kasabay ng mainit na imbestigasyon sa flood control anomalies, kung saan ilang dating at kasalukuyang senador ang nasangkot. Nagsimula pa umano ang mga usapin ng “ouster plot” noong Oktubre.
Nang tanungin kung may kinalaman ito sa Blue Ribbon Committee na pinamunuan noon ni Sen. Panfilo Lacson, itinanggi ni Sotto na may koneksyon.
“Wala, wala, walang nabanggit,” aniya.
Ilang senador umano ang hindi nasiyahan sa paraan ng pagpapatakbo ni Lacson sa imbestigasyon, dahilan upang magbanta ang ilan na kumalas sa majority bloc.
Ayon sa mga tagamasid, kabilang na si dating Senate President Franklin Drilon, ang pagbibitiw ni Lacson sa Blue Ribbon Committee ay itinuturing na “king’s gambit” — isang hakbang upang mapanatili ang liderato ni Sotto at maibsan ang tensyon sa loob ng Senado.
Sa kabila ng mga bulung-bulungan, nananatiling kalmado si Sotto at tila kumpiyansang mananatili ang suporta ng kanyang mga kasamahan sa gitna ng mga isyung umiinit sa Senado.