Ayon kay Solicitor General Menardo Guevarra, kahit na na-disqualify si Bamban Mayor Alice Guo ng Ombudsman, puwede pa rin siyang mag-file ng certificate of candidacy para sa halalan sa susunod na taon.
Sa isang panayam sa “Storycon” sa One News, sinabi ni Guevarra na ang mga kaso laban kay Guo, kabilang ang desisyon ng Ombudsman na alisin siya sa serbisyo, ay hindi pa pinal.
“Oo, puwedeng mag-file si Guo ng candidacy. Pero kung kwalipikado siya o hindi, ibang usapan na ‘yan,” ani Guevarra.
Ang mga kaso niya, tulad ng graft at human trafficking, ay nasa korte pa, at maaaring umabot sa apela. Kaya’t ang huling desisyon sa mga kaso ay maaaring makaapekto sa kanyang kandidatura.
Dalawa lang ang senaryo kung saan maaaring hindi makatakbo si Guo: kung maging pinal ang desisyon ng Ombudsman o kung magpasya ang Comelec laban sa kanya. “Timing ang labanan dito,” dagdag ni Guevarra, kaya’t dapat bantayan ang mga susunod na hakbang.