Kinumpirma ng Philippine Consulate General sa Hong Kong na kabilang ang isang Filipina sa mga nasawi sa malagim na sunog na tumupok sa ilang high-rise buildings sa Tai Po noong nakaraang linggo.

Ayon sa konsulado, si Maryann Pascual Esteban, isang overseas Filipino worker na unang naiulat na nawawala, ay nasawi sa insidente. Sa kanilang pahayag, binigyang-diin nilang si Esteban ay isang masipag na OFW na nagsakripisyo upang mabigyan ng mas magandang kinabukasan ang kanyang pamilya sa Cainta, Rizal. Naiwan niya ang kanyang 10-taóng gulang na anak.

Umabot na sa 128 ang mga nasawi sa sunog sa Wang Fuk Court residential complex, habang 150 pa ang pinaghahanap. Sa tala ng konsulado, 84 na Pilipino ang ligtas, isa ang nasugatan, at pito ang patuloy na bineberipika.

Tinututukan ng konsulado ang sitwasyon at nagpapatuloy ang kanilang operasyon upang matulungan at masuri ang kalagayan ng mga apektadong OFW sa lugar.

Sa ikalawang araw ng Trillion Peso March, muling umapaw ang sigaw laban sa korapsyon habang hinahamon ng mga raliyista si Pangulong Ferdinand Marcos Jr. na ipa-aresto ang “big fish” sa kontrobersyal na flood control scam bago mag-Pasko—o isugal ang kanyang pagtakbo sa 2028.

Mahigit 4,000 katao ang nagtipon sa People Power Monument sa Quezon City sa gitna ng malakas na ulan, kasabay ng paggunita sa kaarawan ni Andres Bonifacio. Suportado ng 86 dioceses, nakiisa ang mga mambabatas, lider-simbahan, artista, at ordinaryong mamamayan.

“Tama na sa maliliit. Dakpin ang malalaki.”

Giit ni Akbayan president Rafaela David, sapat na ang puro pahayag at dapat nang kasuhan at ikulong ang mga pangunahing personalidad na umano’y nakinabang sa bilyon-bilyong pondong ninakaw.
Banta niya:

“Kung hindi kikilos ang administrasyon, ililibing niya ang sarili niyang political future.”

Hinimok din nila si Marcos na sertipikahang urgent ang Anti-Political Dynasty Bill.

Limang panawagan

Ipinresenta ni Kiko Aquino Dee ang limang hiling sa gobyerno:
transparency, prosecution, recovery ng nakaw na pera, pagsunod sa Konstitusyon, at paglaban sa political dynasties.

Remulla: May maaaresto na malapit na

Sinabi ni DILG Secretary Jonvic Remulla na malapit nang ma-indict ang mga pangalang binanggit ni dating DPWH Usec. Roberto Bernardo—kabilang sina Senators Jinggoy Estrada, Chiz Escudero, at iba pang dating opisyal.

Ayon pa kay Remulla, mas kaunti ang raliyista ngayon dahil may inaasahang pag-aresto sa mga nasa abroad na inutusang arestuhin ng Sandiganbayan.

Sa kabila ng mas maliit na bilang, itinuring siyang “very peaceful.”

Mga personalidad na dumalo

Dumalo sa QC rally sina:

• Cardinal Pablo Virgilio David
• Catriona Gray
• Antonio Carpio
• Kiko Pangilinan
• Leila de Lima
• Chel Diokno
• Agot Isidro
• Joy Belmonte, na nagsabing:

“Nalulunod ako sa galit… ang perang para sa bayan, winaldas.”

Manila protests: 3 ‘journalists’ detained but released

Tatlong nagpakilalang freelance journalists ang pansamantalang dinetene sa Maynila dahil sa pagsusuot ng balaclava—bawal na sa lungsod. Pinalaya rin sila matapos ma-verify ang kanilang IDs.

Nagpatuloy pa rin ang hiwalay na kilos-protesta ng militanteng grupo Bayan sa Luneta, kahit hinarang umano ng pulisya ang stage truck at props. Ayon sa MPD, wala silang permit sa Rizal Park.

Umabot sa 3,000 katao ang dumalo.

Patuloy pa ring inaapula ng mga bumbero nitong Huwebes ang napakalaking sunog na tumupok sa isang high-rise housing complex sa Tai Po, Hong Kong, na kumitil na ng hindi bababa sa 44 katao at nag-iwan ng daan-daang nawawala. Itinuturing ito bilang pinakamatinding sunog sa lungsod sa loob ng maraming dekada.

Nagsimula ang apoy noong Miyerkoles hapon sa bamboo scaffolding ng Wang Fuk Court, isang walong-building estate na may 2,000 apartment at kasalukuyang sumasailalim sa malawakang pagkukumpuni. Dahil umano sa naiwanang madaling-suminding materyales sa maintenance work, mabilis na kumalat ang apoy, ayon sa pulisya. Tatlong lalaki ang inaresto kaugnay ng insidente.

Ayon sa mga nakaligtas, maraming residente ang matatanda at hirap gumalaw. Dahil sarado ang mga bintana habang may pagkukumpuni, may ilan pang hindi agad nakapansin na may sunog at kinailangang tawagan ng kapitbahay para makalikas.

Kabilang sa mga nasawi ang isang 37-anyos na firefighter na nawalan ng kontak sa kanyang team bago matagpuang may matinding paso. Higit 900 residente naman ang pansamantalang inilikas sa mga evacuation center.

Sinabi ng mga opisyal na may mga palapag na hindi pa nila maabot dahil sa matinding init, at nananatili ang panganib ng pagkalaglag ng nagliliyab na scaffolding. Patuloy ding iniimbestigahan kung paano kumalat ang apoy sa iba pang gusali, na posibleng dulot ng malakas na hangin at nagliliparang debris.

Nagpaabot ng pakikiramay si Chinese President Xi Jinping at nangakong tutulungan ang mga apektado. Ipinahayag din ni Hong Kong Chief Executive John Lee ang matinding pagdadalamhati at tiniyak ang buong suporta ng pamahalaan.