Tinanghal muli si Shohei Ohtani bilang Most Valuable Player (MVP) ng Major League Baseball, ang kanyang ikaapat na MVP award, matapos tulungan ang Los Angeles Dodgers na makuha ang ikalawang sunod nilang World Series title. Inanunsyo ang panalo nitong Huwebes (Biyernes sa Pilipinas).
Ito na ang ikalawang sunod na National League MVP ni Ohtani para sa Dodgers, matapos niyang makuha ang parehong karangalan noong nakaraang taon. Bago ito, dalawang beses din siyang nagwagi ng American League MVP noong 2021 at 2023 habang kasama ang Los Angeles Angels.
Sa apat na MVP trophies, pumantay si Ohtani sa slugger na si Barry Bonds bilang tanging mga manlalaro na nakakuha ng hindi bababa sa apat na MVP awards. Nangunguna pa rin si Bonds sa kasaysayan na may pitong MVP mula 1990 hanggang 2004.
Patuloy na pinatutunayan ni Ohtani na siya ang isa sa pinakadominanteng manlalaro sa modernong baseball, bilang isang pambihirang two-way superstar na parehong namamayagpag sa pitching at batting.