Bago magsimula ang aktwal na paglilitis kay Vice President Sara Duterte, kailangang unang lutasin ng Senate impeachment court ang mga legal na isyung itinataas niya sa kanyang “answer ad cautelam”—lalo na ang usapin tungkol sa hurisdiksyon ng korte at ang sinasabing paglabag sa one-year ban sa multiple impeachment attempts na nakasaad sa Konstitusyon.
Ayon kay Reginald Tongol, tagapagsalita ng Senate impeachment court, kailangan munang pagdesisyunan at pagdebatehan ang mga isyung ito ng mga senador bilang mga hukom sa impeachment court. Isinumite ng kampo ni Sara ang kanilang “answer ad cautelam” noong Hunyo 25 bilang maingat na tugon.
Aniya sa panayam sa dwIZ, “Ngayong may sagot na ang depensa at nakasagot na rin ang mga taga-prosekusyon ng House, ito ang isa sa mga unang pag-uusapan sa unang araw ng pag-uumpisa ng impeachment court, pagkatapos manumpa ng mga senador bilang mga hukom.”
Pinaninindigan ng kampo ni VP Sara na nilalabag ng impeachment complaint na inaprubahan ng House noong Hunyo 10 ang batas na nagbabawal sa sunud-sunod na impeachment sa loob ng isang taon.
Bilang tugon, nag-submit ang mga taga-prosekusyon ng sertipikasyon na nagpapatunay na sinunod ng House ang proseso ayon sa Artikulo XI, Seksyon 3, Talataan 5 ng 1987 Konstitusyon.
Paliwanag ni Tongol, ang posisyon ni Sara ay pagdedebatihan ng magkabilang panig kasama ang mga senador-hukom. “Kung maghahain ang depensa ng affirmative defense, kailangang magdesisyon ang impeachment court dito. Ang dalawang panig pati na rin ang mga senador-hukom ay magdedebate at magdedesisyon dito.”
Binigyang-diin din niya na maaring gamitin ng parehong kampo ang panahon bago magbukang muli ang ika-20 Kongreso sa Hulyo 28 upang paghandaan ang kanilang mga kaso.
Sa madaling salita, legal showdown muna ang inaasahan bago tuluyang magsimula ang impeachment trial ni Sara Duterte.