Sa gitna ng mahigit tatlong oras ng debate at tensyon, nagdesisyon ang Senado noong Lunes ng gabi na ipasa muna ang articles of impeachment laban kay VP Sara Duterte sa rules committee—na nangangahulugang hindi pa rin tuloy ang trial bago ang June 11, gaya ng nais ng minorya.
Senate Minority Leader Koko Pimentel ay nagtangkang itulak na simulan agad ang impeachment trial, ngunit nauwi ito sa isang kompromiso: mamumuno na si Sen. Chiz Escudero bilang presiding officer, at manunumpa na ang mga senador bilang hukom sa June 10. Ngunit, ang pormal na pagbasa ng mga reklamo ay mananatili sa June 11.
Naging masalimuot ang usapan dahil sa takot ng ilang kaalyado ni Duterte—lalo na si Sen. Bato dela Rosa—na baka ang panunumpa ng mga senador ay maituturing nang pagsisimula ng impeachment court. Paliwanag ni Sen. Joel Villanueva, ang panunumpa ay magbibigay ng “katawan” sa korte, pero hindi pa ito opisyal na bukas.
Sa huli, inaprubahan ang tatlong mosyon nang walang tutol, pero kapwa nainis sina Pimentel at Sen. Risa Hontiveros, dahil sa palagay nila’y masyado nang binawasan ang lakas ng orihinal nilang panukala, at malinaw ang intensyong ipagpaliban ang proseso.
Ayon kay Hontiveros:
“Hindi tayo naipit sa mga patakaran. Pinili nating magpatumpik-tumpik.”
Itinakda ni Senate President Escudero ang pormal na pagbasa sa June 11—tatlong araw bago ang adjournment ng Kongreso sa June 14—at iginiit niyang sinusunod lang niya ang proseso para maiwasan ang legal na sablay.
Ngunit para sa oposisyon, malinaw ang nakikita nilang laro:
“Delay is the strategy.”