Ipinag-utos ng Sandiganbayan Fifth Division ang paglipat at pagkulong kay Senador Jinggoy Estrada sa New Quezon City Male Dormitory Jail sa Barangay Payatas. Ito ay matapos siyang arestuhin sa Senado bunsod ng inilabas na warrant of arrest para sa kanyang kinakaharap na kasong plunder at graft na may kaugnayan sa maanomalyang mga proyekto sa flood control. Dahil ang plunder ay isang krimen na walang kaakibat na piyansa, mananatili sa piitan ang senador habang gumugulong ang paglilitis.
Dumating ang convoy ni Estrada sa pasilidad ng kulungan sa Payatas nitong Lunes ng gabi matapos dumaan sa mga kinakailangang legal at medikal na pagsusuri. Ayon sa ulat ng Department of the Interior and Local Government o DILG, opisyal nang ipinasok ang senador sa general population area ng piitan kasama ang tatlo pa niyang kapwa akusado na sina assistant district engineer Denryl Caesar Cortuna, at mga district engineer na sina Manny Bulusan at Arturo Gonzales Jr. Binigyang-diin ng pamahalaan na walang espesyal na tratong ibibigay at parehong patakaran ang ipatutupad sa kanila anuman ang kanilang katungkulan o estado sa lipunan.
Samantala, hindi naman muna dinala sa parehong kulungan ang isa pang kasama sa kaso na si dating Department of Public Works and Highways o DPWH Secretary Manuel Bonoan. Bagamat itinuturing na rin itong arestado, pansamantala muna siyang isinugod at isinailalim sa obserbasyon sa PNP General Hospital sa Camp Crame dahil sa biglaang pagtaas ng kanyang presyon ng dugo.