Ang P-pop kings na SB19 ay pumasok sa Billboard Japan Top Albums Sales Chart habang ginaganap ang kanilang Tokyo leg ng “Simula at Wakas” world tour.
Nailabas sa Japan noong Setyembre 17 ang physical copy ng kanilang third extended play na may parehong pamagat, kaya’t nakapasok ito sa chart sa No. 17 matapos makabenta ng 3,578 units—unang pagkakataon para sa SB19 na maitala sa chart na sumusubaybay sa physical album sales sa Japan.
Kasabay ng kanilang chart entry, nag-perform ang grupo sa Zepp Haneda sa Tokyo noong Setyembre 24, kabilang ang kanta nilang “Kapangyarihan”, na kolaborasyon nila kay Ben&Ben at naging simbolo ng protesta laban sa korapsyon sa Pilipinas.
Sa Tokyo show, nakasuot ng itim na may puting ribbons sa balikat ang bawat miyembro, bilang pagpapakita ng kanilang suporta sa mga Pilipinong lumalaban para sa hustisya. Ani Stell, “Hindi lang bilang Filipino, kundi bilang artist, ang pag-perform namin ay paraan ng pagprotesta. Buong-buo ang suporta namin sa lahat ng sumisigaw ng hustisya sa korapsyon at pagnanakaw sa kaban ng bayan.”
Nagbahagi rin ang SB19 ng maikling video ng kanilang performance sa social media, kung saan nag-comment si Ben&Ben ng “goosebumps malala!”
Susunod na buwan, magkakaroon ang SB19 ng tatlong shows sa Middle East, isang show sa Thailand sa Nobyembre, at apat na shows sa Australia at New Zealand sa Disyembre.