Inihayag ni Risa Hontiveros na ilalabas ng tinaguriang “united opposition” ang kanilang common candidates para sa 2028 elections bago matapos ang taon o sa unang bahagi ng susunod na taon.

Ayon kay Hontiveros, walang kinalaman ang maagang pag-anunsyo ng kandidatura sa pagkapangulo ni Sara Duterte sa kanilang timeline. May sarili aniya silang proseso upang makapili ng iisang pambato. Sa ngayon, nakatuon muna ang grupo sa “pag-aayos ng sariling bakuran” upang maging mas matatag bago ang 2028.

Binubuo ang oposisyon ng mga “pink” forces na sumuporta kay Leni Robredo noong 2022, kasama ang Liberal Party at iba pang kaalyadong grupo. Bahagi rin si Robredo sa mga paunang pag-uusap para sa paghahanda sa susunod na halalan.

Hindi pa tiyak kung makikipag-alyansa sila sa ibang kampo, kabilang ang grupo ni Ferdinand Marcos Jr., upang pigilan ang posibleng “Duterte 2.0.” Aniya, nakadepende ito sa pagkakaroon ng sapat na magkakatulad na paninindigan.

Hindi rin diretsahang sinagot ni Hontiveros kung siya o si Bam Aquino ang posibleng maging standard bearer ng oposisyon. Nauna na niyang sinabi na bukas siya sa pagtakbo sa mas mataas na posisyon sa 2028, depende sa resulta ng konsultasyon sa kanilang mga kaalyado.

Samantala, sinabi niyang handa siyang gumanap bilang senator-judge sakaling umusad muli ang impeachment complaint laban kay Duterte, na nauna nang ibinasura ng Korte Suprema dahil sa one-year bar rule.

Para naman kay political analyst na si Barry Gutierrez, maaaring konektado ang maagang pagdedeklara ni Duterte sa posibleng pag-usad muli ng impeachment case, upang ipaalala sa mga mambabatas ang political reality papasok ng 2028.

Sa gitna ng imbestigasyon sa umano’y “ghost” flood control projects sa Bulacan, tuloy ang konstruksyon ng isang proyektong nakatayo sa reclaimed area ng Laguna de Bay na inuugnay sa parehong kontratista.

Ang proyekto na may halagang P94.04 milyon ay ipinapatupad ng Department of Public Works and Highways (DPWH) Metro Manila 1st District Engineering Office at iginawad sa Topnotch Catalyst Builders Inc., kumpanyang nasangkot sa kontrobersyal na flood control scam sa Bulacan.

Sa datos ng DPWH transparency portal, ang proyekto—“Improvement of Laguna Lakeshore Area, Barangay Lower Bicutan (Phase I), Taguig City”—ay nakalista bilang flood control structure, partikular na slope protection. Gayunman, nauna nang sinabi ng DPWH na road project ito, hindi flood control.

Nauna nang iniulat na ang Topnotch ay nabigyan ng mahigit P170 milyon na flood control at slope protection projects sa Bulacan, kung saan umamin sa katiwalian ang dating district engineer na si Henry Alcantara. Ang may-ari ng kumpanya na si Eumir Villanueva ay nasa lookout bulletin ng Department of Justice kaugnay ng patuloy na imbestigasyon.

Sa kabila ng suspensyon ng reclamation activities ng Laguna Lake Development Authority, nakita sa site ang patuloy na paglipat ng lupa at konstruksyon. Ayon sa tala, 70% na ang natatapos sa Phase I, habang 59% naman sa Phase II na may kahalintulad na halaga.

Kapansin-pansin din na hindi lumalabas ang nasabing proyekto sa flood control list ng “Sumbong sa Pangulo” website ni Ferdinand Marcos Jr..

Sa kabila ng pagkakadawit sa Bulacan scandal, may 68 pang aktibong kontrata sa gobyerno ang Topnotch hanggang Pebrero 17, batay sa DPWH records.

Sinuspinde ng Land Transportation Office ang lisensya ng isang e-tricycle driver na sangkot sa magkahiwalay na hit-and-run incidents sa Pasay.

Ayon sa LTO, una umanong nakabangga at tumakas ang driver bago dumaan sa isang national road na ipinagbabawal para sa e-bikes at e-trikes. Kalaunan, nasangkot muli ito sa isa pang hit-and-run. Kumalat sa social media ang CCTV footage ng insidente.

Ipinataw ang 90-araw na suspensyon sa lisensya ng driver habang inilagay sa alarm status ang e-trike habang iniimbestigahan ang kaso. Naglabas din ng show-cause order laban sa driver at sa rehistradong may-ari ng sasakyan at pinadadalo sila sa pagdinig ng LTO Intelligence and Investigation Division.

Pinagsusumite rin ng sinumpaang salaysay ang driver upang ipaliwanag kung bakit hindi siya dapat kasuhan ng reckless driving at paglabag sa traffic signs.