Sinisiyasat ngayon ng Office of the Ombudsman at ng Department of Public Works and Highways (DPWH) ang mga kontrata ng mag-asawang kontraktor na sina Cezarah “Sarah” at Pacifico “Curlee” Discaya, kaugnay ng umano’y koneksyon nila sa CLTG Builders — kompanyang inuugnay sa pamilya ni Senador Bong Go.

Kinumpirma ni Public Works Secretary Vince Dizon ang imbestigasyon sa isang ambush interview nitong Huwebes. Aniya, nakipagpulong siya kay Ombudsman Crispin Remulla para talakayin ang mga dokumentong susuriin mula pa noong 2016 hanggang 2025, bilang bahagi ng mandato ng Independent Commission for Infrastructure (ICI).

“Walang sasantuhin dito. Tinitingnan namin ang mga dokumento mula sa nakaraang administrasyon, kasama na ang mga kontrata ng Discayas,” pahayag ni Dizon.

Dagdag pa niya, kabilang sa sinusuri ngayon ay ang posibleng ugnayan ng Discayas sa CLTG Corporation, na ayon sa mga ulat ay pag-aari ng ama ni Sen. Go.

Ibinahagi rin ni Dizon na mismong si Remulla ang tumawag sa kanya matapos tumigil sa pakikipagtulungan sa imbestigasyon ang mag-asawang Discaya.

Noong Lunes, itinanggi naman ni Senador Bong Go ang anumang partisipasyon sa joint venture ng CLTG Builders at ng mag-asawang Discaya.

Patuloy pa rin ang pagsusuri ng Ombudsman at DPWH sa mga kontrata upang matukoy kung may iregularidad sa mga proyektong pinondohan ng gobyerno sa ilalim ng mga nakalipas na administrasyon.

Bumaba ang tiwala ng publiko kina Pangulong Ferdinand Marcos Jr. at Pangalawang Pangulong Sara Duterte batay sa pinakabagong Social Weather Stations (SWS) survey para sa ikatlong quarter ng 2025.

Ayon sa survey na isinagawa noong Setyembre 24–30, 43% ng mga Pilipino ang may tiwala kay Marcos — mas mababa kumpara sa 48% noong Hunyo. Si Duterte naman ay bumaba mula 61% tungo sa 53%.

Tumaas din ang bilang ng mga respondent na may “mababang tiwala” sa Pangulo (mula 30% naging 36%) at sa Pangalawang Pangulo (mula 23% naging 28%). Sa net trust rating, nakakuha si Duterte ng +25, habang si Marcos ay +7 lamang.

Pinakamataas ang tiwala kay Marcos sa Luzon (51%), habang pinakababa sa Mindanao (27%). Si Duterte naman ay patuloy na malakas sa Mindanao (82%), kasunod ang Visayas (56%).

Ayon kay Presidential Communications Undersecretary Claire Castro, hindi pinapansin ni Marcos ang mga numero at mas mahalaga umano sa kanya na maramdaman ng taumbayan ang presensya ng gobyerno.

Tumanggi naman si Duterte na magbigay ng dahilan sa pagbaba ng kanyang rating habang naghihintay pa ng desisyon ang Korte Suprema sa kanyang impeachment case.

Ayon kay Stratbase president Dindo Manhit, ang resulta ng survey ay nagpapakita ng pagbabago sa damdamin ng publiko tungo sa kasalukuyang liderato.

Umatras na sa pakikipagtulungan sa Independent Commission for Infrastructure (ICI) ang mag-asawang kontratista na sina Curlee at Sarah Discaya, matapos mabigo ang kanilang pag-asang maging state witnesses sa flood control corruption scandal.

Ayon kay ICI executive director Brian Keith Hosaka, pinili ng mag-asawa na gamitin ang kanilang right against self-incrimination at tumigil sa pagsasabi ng impormasyon kaugnay ng imbestigasyon. Gayunman, tiniyak niyang magpapatuloy ang ICI sa pagsasampa ng mga kaso gamit ang mga naunang testimonya ng Discayas at iba pang saksi.

Sinabi naman ni Ombudsman Jesus Crispin Remulla na hindi rin naging bukas ang mag-asawa sa buong detalye ng katiwalian. “Hindi sila nagsabi ng lahat. Parang pinipili lang nila kung ano ang ilalabas,” ani Remulla, na dating nakaharap na rin sa kanila noong siya pa ang DOJ secretary.

Nabago umano ang desisyon ng Discayas matapos sabihin ni ICI member Rogelio Singson sa isang panayam na wala siyang nakikitang dahilan para bigyan sila ng state witness status. “Hindi sila ‘least guilty.’ Sila mismo ang mga pangunahing sangkot,” ani Singson.

Kasalukuyang may P7.1 bilyong tax evasion case ang Discayas. Si Curlee ay nasa kustodiya pa rin ng Senado matapos ma-cite for contempt, at nagsumite na ng habeas corpus petition para sa kanyang paglaya.

Samantala, inaprubahan ng DOJ ang bagong immigration lookout bulletin order (ILBO) para sa 16 pang indibidwal na konektado sa flood control anomaly, kabilang ang dating kongresista Mitch Cajayon-Uy at negosyanteng Arturo Atayde, ama ni QC Rep. Arjo Atayde.

Tiniyak naman ni Pangulong Ferdinand Marcos Jr. na ang imbestigasyon ng ICI ay “walang kinikilingan” at susundan lamang ang ebidensya, kahit kanino pa ito humantong.