Iniutos ng Court of Appeals (CA) ang pag-freeze ng mga ari-arian ng pansamantalang sinuspendihang Mayor Alice Guo ng Bamban, Tarlac, at ilan pang indibidwal at kumpanya na umano’y sangkot sa illegal na Philippine offshore gaming operators (Pogos), ayon sa Anti-Money Laundering Council (AMLC) nitong Huwebes.
Base sa pahayag ng AMLC na ibinahagi ni Sen. Sherwin Gatchalian sa mga mamamahayag, sakop ng July 10 freeze order ang 90 bank account sa 14 financial institutions, ilang real properties, at mataas na halagang personal na ari-arian, tulad ng mga luxury vehicles at helicopter.
“Inaprubahan ng Court of Appeals ang ex parte petition ng AMLC para sa paglabas ng freeze order, na epektibong nagpapatigil sa mga ari-arian ng mga indibidwal at entidad na sangkot umano sa mga illegal na aktibidad,” sabi ng AMLC.
Layon umano ng desisyong ito na pigilan ang paglalabas ng ari-arian habang ang imbestigasyon at legal na proseso ay patuloy.
Sinabi rin ng AMLC na nag-file sila ng petisyon para sa freeze order noong July 8.
Hindi ipinahayag ng AMLC ang halaga ng mga bank account at ari-arian na ni-freeze, at hindi agad maabot ang mga opisyal nito para sa komento at karagdagang detalye.