Nasama ang pangalan ni Rose Nono Lin, kilala bilang “Pharmally Queen,” sa matrix ng POGO syndicate, ayon kay Sen. Risa Hontiveros sa isang Senate hearing. Inilabas ni Hontiveros ang listahan ng mga major players sa POGO syndicate, kabilang sina Michael Yang, Alice Guo, at Weixiong Lin, pati na si Rose Lin, na konektado sa mga ilegal na aktibidad tulad ng human trafficking, money laundering, at iba pang krimen.
Si Rose Lin, asawa ni Weixiong Lin, ay nahulog sa radar dahil sa kanyang papel sa Paili Holdings at Xionwei Technology, na ginagamit sa operasyon ng POGO. Ayon kay Hontiveros, ginagamit ng mga sindikato ang mga dokumento ng mga Pilipino at mga ilegal na negosyo para sa pansariling kapakinabangan, habang ang kaligtasan ng bansa ay nailalagay sa panganib. Nangako ang senador na hindi papayagan ang ganitong uri ng panlilinlang at pang-aabuso.