QUEZON CITY — Nahaharap ngayon sa mga reklamong diskwalipikasyon si Rose Nono Lin, kandidato sa pagkakongresista sa ika-5 Distrito ng Quezon City, dahil umano sa paglabag sa mga alituntunin ng Commission on Elections (Comelec) ukol sa kampanya sa panahon ng Mahal na Araw.
Ayon sa dalawang magkahiwalay na petisyon na inihain sa Comelec nitong Huwebes, nagpapatuloy umano ang kampanya ni Lin kahit sa mga araw na tahasang ipinagbabawal ito — partikular noong Huwebes Santo (Abril 17), Biyernes Santo, at Sabado de Gloria (Abril 19), batay sa nakasaad sa Omnibus Election Code. Ayon sa Comelec, ang mga araw na ito ay hindi dapat gamitin sa anumang aktibidad na may kinalaman sa pangangampanya bilang paggalang sa banal na okasyon.
Sa reklamo ni Ligaya Sta. Ana, binanggit na nagtayo ang kampo ni Lin ng tent sa tapat ng Nova Plaza Mall sa Novaliches noong Huwebes Santo, kung saan namahagi sila ng libreng inumin habang humihingi ng boto sa mga dumaraan.
“Ginamit ng kanyang kampo ang isang banal na araw ng pagninilay bilang pagkakataon para makapangampanya. Ang pamimigay ng benepisyo kapalit ng suporta ay isang anyo ng vote-buying,” ayon kay Sta. Ana.
Sa hiwalay na reklamo ni Karen Altar, iniulat ang umano’y sistematikong pamimigay ng pera, bigas, at campaign materials mula Marso 29 hanggang Abril 21. Ayon sa kanya, layunin ng aktibidad ang maka-impluwensiya ng boto, at siya mismo ay nakatanggap ng naturang mga benepisyo.
“Organisado at tuloy-tuloy ang pamimigay, at malinaw na ito ay nakatuon sa pagkumbinsi sa mga botante,” saad sa reklamo.
Mga Aktibidad sa Social Media Platforms
Aktibo rin ang social media pages ni Lin sa parehong mga araw na ipinagbabawal ng Comelec. Batay sa nakalap na screenshots na kalakip ng reklamo, naglabas ng campaign materials sa kanyang opisyal na Facebook page noong Abril 14, 2025 — at muli mula Abril 17 (Huwebes Santo) hanggang Abril 19 (Sabado de Gloria). Isa itong tahasang paglabag sa kautusan ng Comelec na ipinagbabawal ang anumang uri ng pangangampanya — online man o pisikal — sa mga araw ng Mahal na Araw.
Makikita sa screenshot sa ibaba ang mga campaign materials na patuloy ang pagtakbo, isang malinaw na indikasyon ng pangangampanya noong Semana Santa. Kinuhanan ang screenshot na ito noong Sabado de Gloria,Abril 19.
Dahil dito, hiniling ng mga nagpetisyon ang diskwalipikasyon ni Rose Nono Lin bilang kandidato sa ilalim ng Section 68 ng Omnibus Election Code, na nagpaparusa sa sinumang lalabag sa mga itinakdang patakaran ng kampanya.
Si Lin ay dati na ring nasangkot sa kontrobersiya matapos maiugnay sa Pharmally Pharmaceutical Corp., isang kumpanyang iniimbestigahan noon dahil sa umano’y anomalya sa pagbili ng medical supplies sa panahon ng pandemya.
Sa ngayon, wala pang opisyal na pahayag mula sa kampo ni Lin kaugnay ng mga reklamong isinampa.
SOURCE: https://www.inquirer.net/439175/disqualification-cases-filed-vs-quezon-city-laguna-bets/