Mula sa pagiging baguhan hanggang sa pagiging pangunahing tagapagtaguyod ng tennis sa bansa — iyan ngayon si Hayb Anzures, ang 31-anyos na negosyante na tinaguriang bagong “godfather” ng Philippine tennis.

Isang taon pa lang mula nang unang humawak ng raketa si Anzures, pero agad siyang nagmarka sa sports community matapos itatag ang Gentry Open Tennis Championships sa San Jose del Monte, Bulacan — ang pinakamalaking lokal na torneo sa kasalukuyan na may P2 milyong kabuuang premyo.

“Magkaiba talaga ang saya ng tennis kumpara sa basketball, football, o golf. Ang tennis community, napakawelcoming,” ani Anzures, na dating business management student sa Far Eastern University.

Ayon sa kanya, ang tagumpay ni Alex Eala sa international stage ang nagsilbing inspirasyon para tumulong siya sa pagpapaunlad ng lokal na tennis.

“Ang pag-angat ni Alex Eala ay nagbigay ng pag-asa sa mga Pinoy tennis fans. Nais kong makibahagi sa pagbangon ng isport sa Pilipinas,” paliwanag niya.

Sa pamamagitan ng Gentry Open, umaasa si Anzures na mas marami pang kabataang atleta ang mahihikayat na pasukin ang tennis — at muling buhayin ang sigla ng isport sa bansa.

Matapos ang isang kapanapanabik na bakbakan, nagtapos ang China stop ng NBA preseason sa panalo ng Brooklyn Nets laban sa Phoenix Suns, 111-109, nitong Linggo sa Venetian Arena.

Bumawi ang Nets matapos silang matalo ng Suns sa overtime noong Biyernes, 132-127. Sa muling paghaharap, halos walang lumamang hanggang sa huling segundo ng laro.

Naitabla ng Suns ang iskor sa 109-all matapos ang tres ni Jared Butler sa natitirang 17.5 segundo. Sa huling possession, pinatagal ng Nets ang oras at napunta ang bola kay Tyrese Martin, na tinangkang magbitaw ng tres ngunit na-foul ni David Duke Jr.

Sa gitna ng boo ng mahigit 11,000 fans, pumasok ang una at huling free throw ni Martin, dahilan para lumamang ang Brooklyn, 111-109. Tinangka pa ng Suns na makaiskor sa inbound play, pero na-deflect ito ng Nets bago tumunog ang buzzer.

Bagama’t naiiwan ng hanggang 14 puntos sa fourth quarter, unti-unting bumawi ang Brooklyn sa pangunguna ni Cam Thomas na may 16 puntos at 4 rebounds. Tumulong din sina Michael Porter Jr. at Ziaire Williams na may tig-15 puntos, habang nag-ambag ng 11 si Martin — kabilang ang game-winning free throws.

Sa panig ng Suns, umarangkada si Devin Booker na may 18 puntos, 5 rebounds at 5 assists. Nagdagdag ng tig-12 puntos sina Dillon Brooks at Oso Ighodaro.

Ang laban ang nagmarka ng pagtatapos ng unang NBA games sa China matapos ang anim na taon, na sinabayan ng iba’t ibang basketball events tulad ng pagbubukas ng bagong NBA Store at NBA House sa The Londoner.

Isang dikit, ngunit makasaysayang pagtatapos para sa NBA China Games 2025.

Matapos ang anim na taong pahinga, opisyal nang nagbabalik ang NBA sa China — at ayon kay Commissioner Adam Silver, ramdam na ramdam nila ang “tremendous interest” ng mga fans.

Ngayong linggo, nagpunta sa Macau ang mga bituin at opisyal ng liga para sa dalawang preseason games ng Brooklyn Nets at Phoenix Suns — ang unang NBA games sa China mula noong 2019, nang maipit ang relasyon ng liga sa bansa dahil sa isang kontrobersyal na tweet tungkol sa Hong Kong protests.

“Napakalaki ng excitement dito sa China. Ang saya na makabalik ulit,” pahayag ni Silver. Dagdag pa niya, maaaring magbukas ang mga sold-out games na ito ng mas marami pang NBA events sa bansa.

Magaganap ang mga laban sa arena ng Las Vegas Sands sa Macau, na kilala bilang tanging lugar sa China kung saan legal ang casino gambling. Kasabay nito, gaganapin din ang fan event na dadaluhan ng mga personalidad tulad ni Shaquille O’Neal.

Sinabi naman ni Devin Booker ng Suns na malaki ang fanbase nila sa China at mahalaga ang “basketball without borders” upang makalapit sila sa mga tagahanga.

Huling naglaro ang NBA sa Macau noong 2007, at ngayon ay umaasa ang mga lokal na opisyal na makatutulong ang sports events tulad nito sa pagpapalakas ng turismo at imahe ng lungsod bilang global destination.

Kasabay ng pagbabalik ng NBA, inanunsyo rin ng Alibaba Cloud ang bagong multi-year partnership bilang opisyal na cloud computing at AI partner ng NBA China — na lalong nagpapatibay sa koneksyon ng liga sa bansa.