Magandang balita para sa mga fans ng manga at anime — makakakuha na ng live-action na pelikula ang Sakamoto Days! Kinumpirma na si Ren Meguro, miyembro ng sikat na idol group na Snow Man at kilala sa mga drama tulad ng My Happy Marriage (2023), ang gaganap bilang Taro Sakamoto, ang dating kilabot na assassin na naging mabait na ama at tindero.
Sa pelikulang ito, makikita ang kakaibang timpla ng aksyon, komedya, at puso ng karakter ni Sakamoto. Aminado si Meguro na malaking hamon ang gampanan ang “matabang assassin” na bahagi ng charm ng karakter, pero tinanggap niya ito nang buong saya. Aniya, “Si Sakamoto ay minsang kinatatakutan, pero ngayon ay isang ama na inuuna ang pamilya. Doon nagmumula ang tunay niyang coolness.”
Dagdag pa niya, ito rin ang kauna-unahang pagkakataon na sinubukan niya ang full-on action scenes, na nagbigay sa kanya ng bagong kumpiyansa sa pag-arte. Pinuri rin niya ang direktor na si Yuichi Fukuda sa pagtulong maipakita ang humor at puso ng orihinal na kwento.
Unang mapapanood ang Sakamoto Days live-action sa mga sinehan ng Japan sa Golden Week ng 2026 (Abril 29 – Mayo 6). Wala pang petsa ng release para sa Pilipinas.
Ang Sakamoto Days ay obra ni Yuto Suzuki na unang lumabas sa Weekly Shonen Jump noong 2020, at hanggang ngayon ay may 23 collected volumes na sa Japan. Nagsimula rin nitong Enero 2025 sa Netflix ang anime adaptation nito na dinirek ni Masaki Watanabe.