Nilinaw ni Kapuso star at beauty queen Rabiya Mateo ang kumakalat na blind item tungkol sa celebrity couple na gustong makapasok nang libre sa concert ng Korean superstar na si IU.
Noong Sabado, June 1, nagkaroon ng concert ang kilalang Korean singer-actress sa Philippine Arena.
Ayon sa kumakalat na blind item, may isang aktor at isang beauty queen na pumasok sa concert venue nang walang bayad at gustong umupo sa VIP seat.
May mga ipinakitang IG story ng Kapuso actor habang nanonood ng concert.
Agad pinabulaanan ni Rabiya ang alegasyon laban sa kanila ng kanyang dyowang si Jeric Gonzales.
Depensa ni Rabiya, nagbayad sila ng concert ticket na nagkakahalagang P12,000 para mapanood si IU.
Saad ni Rabiya, “Ang bilis mag-assume ng ibang tao nang hindi muna kumukuha ng tamang impormasyon. Hindi lahat ng nababasa online ay totoo. Hindi lahat ng nakikita ay tunay. Hindi lahat ng naririnig ay dapat ipost online sa kapinsalaan ng iba.
“May batas tayo para protektahan ang inosente at parusahan ang may sala.”
Giit pa ni Rabiya, nakita rin ng ibang tao kung paano sila pumila sa mga concert nina Lee Min Ho, Ed Sheeran, at Coldplay. Hindi sila kailanman umastang VIP sa mga concert.
Agad naglabas ng apology statement ang admin ng Facebook page na nagpakalat ng blind item.
Inamin ng admin na nagkamali siya at hindi nagsagawa ng fact-checking, dumipende lang sa narinig mula sa usher tungkol kina Rabiya at Jeric.
Sinabi rin ng admin na marami rin ang nabiktima ng duplicate tickets gaya ng celebrity couple.
In-acknowledge ni Rabiya ang statement ng admin at sinabing nag-reach out na rin ito sa kanila.