Simula Hunyo: Quezon City Magbibigay ng 420,000 Learning Kits sa mga Estudyante
Maghahanda na ang pamahalaang lungsod ng Quezon City ng mahigit 420,000 learning kits para sa mga estudyante mula kinder hanggang Grade 12 sa mga pampublikong paaralan simula sa susunod na buwan. Bahagi ito ng patuloy na suporta ng lungsod sa edukasyon.
Simula 2020, nakapamigay na ang Quezon City ng higit 2.4 milyong learning kits sa mga mag-aaral. Kasama sa mga ito ang school bag, notebooks, ballpen, pencils, whiteboard, marker, water tumbler, at iba pang gamit pang-eskwela.
Sa panahon ng pandemya, nagbigay din ang lokal na pamahalaan ng mga computer tablets at gadgets para tulungan ang blended learning. Bukod dito, nakatanggap din ng laptops ang mga guro at college students ng Quezon City University.
Pagkatapos ng kanyang malaking panalo sa midterm elections, nangako si Mayor Joy Belmonte na palalawakin pa ang benepisaryo ng scholarship programs ng lungsod.
Magbubukas ang klase sa pampublikong paaralan ng Quezon City sa Hunyo 16, handang salubungin ang mga estudyante kasama ang mga bagong kagamitan.