Pumirma ang 8990 Holdings Inc., isang developer ng abot-kayang pabahay, ng kasunduan sa gobyerno ng Quezon City para magbigay ng 2,700 tahanan para sa mga lokal na empleyado at informal settlers.
Sa ilalim ng kasunduan, magbibigay ang subsidiary ng 8990 Holdings, ang 8990 Housing Development Corp., ng 2,699 housing units na matatagpuan sa bagong proyekto nilang Urban Deca Homes Commonwealth sa Brgy. Commonwealth, malapit sa Batasan Road.
Ayon kay Quezon City Mayor Joy Belmonte, ang proyektong ito ay makakatulong sa pangarap ng bawat pamilyang Pilipino na magkaroon ng sariling tahanan.
“Ang 2,699 na tahanan ay agad na magiging available para sa mga benepisyaryo mula sa District 2,” pahayag ni Belmonte.
Pinuri niya ang 8990 sa kanilang pagsisikap na magtayo ng magandang proyekto para sa mga low-income earners.
Ayon kay Mariano Martinez Jr., chairman ng 8990 Housing Development, ito ang kauna-unahang housing project na kanilang pinagsamahan kasama ang isang local government unit.
Umaasa si Martinez na sa proyektong ito, mas magiging “malapit ang komunidad sa isang inclusive at empowered Quezon City.”