Magbabalik ang 13th QCinema International Film Festival mula Nobyembre 14 hanggang 23 sa anim na sinehan sa Quezon City, tampok ang mga pelikulang umikot na sa mga prestihiyosong festival at ilan sa mga kandidato para sa Oscars 2026. Sa paglulunsad ng festival, binigyang-diin ni Mayor Joy Belmonte ang pagkilalang natanggap ng QCinema bilang Hall of Fame awardee sa Pearl Awards, at inihayag ang hangaring maideklarang UNESCO Creative City of Film ang Quezon City.
Ipinahayag ng artistic director Ed Lejano na ang tema ngayong taon ay “Film City,” na nagbibigay pugay sa mga haligi ng pelikulang Pilipino gaya nina Lino Brocka, Ishmael Bernal, at Fernando Poe Jr. Binigyang-diin din nila ang pagnanais na mapalapit ang pelikula sa publiko kaya’t itinatakda ang presyo ng tiket sa ₱250 lamang, habang libre naman ang unang palabas araw-araw sa lahat ng venue maliban sa Gateway.
Sa lineup ng festival, tampok ang “Couture” ni Alice Winocour bilang pambungad na pelikula, at ang “Open Endings” nina Janella Salvador, Klea Pineda, Jasmine Curtis-Smith, at Leanne Mamonong sa Asian Next Wave section. Kabilang din sa mga ipapalabas ang mga obra mula Cannes, Venice, at iba pang pandaigdigang festival, kabilang sina Kristen Stewart, Chloe Zhao, at Paul Mescal, gayundin ang mga bagong gawa ng mga lokal na direktor sa QCShorts at QCSelects.