Ibinunyag ni US Defense Secretary Lloyd Austin III ang tungkol sa isang yunit ng tropang Amerikano sa bansa na tinawag na “US Task Force Ayungin.” Ngunit wala pang opisyal na pahayag mula sa Department of National Defense (DND) at Armed Forces of the Philippines (AFP) ukol dito.
Ang pangalan ng task force ay tila tumutukoy sa Ayungin Shoal (Second Thomas Shoal) sa West Philippine Sea, kung saan nakabase ang mga tropa ng AFP gamit ang nakadaong na BRP Sierra Madre. Ang lugar na ito ay madalas sentro ng tensyon sa pagitan ng Pilipinas at China, lalo na tuwing may resupply missions.
Sa kanyang pagbisita sa Palawan nitong Martes, binanggit ni Austin ang task force:
“Binisita ko ang Command and Control Fusion Center sa Palawan. Nakipagkita rin ako sa ilang American service members na nakatalaga sa US Task Force Ayungin at pinasalamatan sila sa kanilang serbisyo para sa kapakanan ng mga Amerikano at ng ating mga alyansa sa rehiyong ito,” ani Austin sa isang post sa X.
Kasama si Defense Secretary Gilbert Teodoro, dumalo si Austin sa mga pagpupulong, demonstration ng kagamitan, at press conference sa Western Command ng AFP sa Puerto Princesa.
Binanggit din ni Austin ang suporta ng US sa Pilipinas, partikular sa Mutual Defense Treaty, at pinuri ang paggamit ng unmanned surface vessels na ibinigay ng US para sa pagpapalakas ng kakayahan ng AFP.
“Ang pangako ng Amerika sa depensa ng Pilipinas ay matibay at walang pag-aalinlangan,” diin ni Austin.