Nagtagpo-tagpo ang pagkakaisa at pagkakapantay-pantay sa Pride Run 2025 na ginanap noong Linggo sa SM Mall of Asia Complex. Umabot sa 10,000 participants ang lumahok sa ikalawang edisyon ng event na inorganisa ng RUNRIO at co-presented ng SM Supermalls.
Hindi lang sa MOA naganap ang fun run, kundi kasabay din sa SM Seaside City Cebu at SM Lanang Davao para sa isang pambansang selebrasyon ng LGBTQIA+ community.
Sa 10K category, nanalo si Jaspher Delfino na natapos ang takbuhan sa loob ng 35 minuto at 19 segundo, na tatlong minuto at kalahati ang lamang kay Aldrin Serrano na pumangalawa. Sumunod sina Caesar Mabaquiao, Prince March Son Pettalana, at Ryan Godinez.
Sa 5K, si Mark Angelo Biagtan ang nanguna sa oras na 16 minuto at 43 segundo, habang pinangunahan naman ni Cavin Vidal ang 3K run sa 9 minuto at 49 segundo. Sa 1K Dog race naman, sina Romel Espinoza at Dino ang nanalo na may oras na 4 minuto at 31 segundo.
Ani Rio de la Cruz, presidente at CEO ng RUNRIO, “Nakakatuwang makita ang pride at maipakita ang spotlight sa LGBTQIA+ community. Lahat tayo ay allies na pinag-uugnay ng iisang pagmamahal.”
Bilang suporta sa advocacy, nag-donate ang RUNRIO ng P200,000 sa partner na PANTAY para sa inklusibidad, representasyon, at pagkakapantay-pantay.
Katuwang sa pag-organisa ang SM MOA Complex, Cristalino Spring, Klook, GOMO, GRWM Cosmetics, Popmart, Department of Health, at marami pang iba. Isang makulay at makabuluhang pagtitipon ang Pride Run 2025 na nagdiwang ng pagkakaiba-iba at pagkakaisa!