Hinarap ni South Korean President Yoon Suk Yeol ang panawagang magbitiw matapos ang bigong pagtatangkang magdeklara ng martial law, na agad ibinasura ng mga mambabatas at ikinagalit ng libu-libong nagprotesta.
Ang hakbang na ito, na ikinagulat ng buong mundo, ay nagdulot ng pinakamalalang krisis sa kasaysayan ng demokrasya ng bansa. Kahit ang US, na may 30,000 tropa sa South Korea, ay nagpahayag ng pagkabahala.
Ang oposisyon, pati na rin ang mga labor unions, ay nananawagang magbitiw si Yoon, habang banta naman ng impeachment ang nakahanda kung tumanggi siya. Kahit ang kaalyado niyang partido ay tumutuligsa sa kanyang aksyon.
Sa huli, umatras si Yoon matapos ang botong unanimous ng 190 mambabatas para ibasura ang martial law. “Tatanggapin namin ang desisyon ng National Assembly,” ani Yoon sa isang televised address.
Ngunit para sa mga nagprotesta, hindi sapat ang pag-atras. “Ang ginawa niyang ito ay krimen at daan patungo sa impeachment,” ayon kay Lim Myeong-pan, isa sa mga demonstrador.