Patuloy na nagpapagaling si Pope Francis sa Rome’s Gemelli Hospital matapos ma-diagnose na may polymicrobial infection sa respiratory tract. Ayon sa Vatican, mas kumplikado ang kanyang kondisyon kaysa unang inakala, kaya kinakailangang palawigin ang kanyang pananatili sa ospital.
Sa kabila nito, nananatiling aktibo ang Santo Papa—nagbasa siya ng mga dokumento at nagsagawa ng ilang trabaho sa ikaapat niyang araw ng confinement. Wala rin siyang lagnat, ngunit patuloy ang gamutan upang masigurong gumaling nang tuluyan.
Dahil sa kanyang kondisyon, kinansela na rin ng Vatican ang kanyang regular na Wednesday audience. Gayunpaman, tiniyak ng mga opisyal na nananatiling positibo ang Santo Papa at nagpapasalamat siya sa lahat ng dasal at suporta na natatanggap mula sa buong mundo.
Matatandaang si Pope Francis, 88, ay may history na ng mga problema sa kalusugan, kabilang ang bronchitis, operasyon sa hernia, at matinding pananakit ng tuhod na madalas niyang gamitan ng wheelchair.
Bagamat bukas siya sa posibilidad ng pagbibitiw kung hindi na kaya ng kanyang katawan, sinabi niya sa isang memoir na wala pa siyang dahilan para gawin ito sa ngayon.