Mga opisyal ng isang Philippine Offshore Gaming Operator (POGO) umano’y binayaran ng tinanggal na Mayor ng Bamban, Alice Guo, para manahimik tungkol sa kanilang partisipasyon, ayon kay “Alex,” treasurer ng Zun Yuan Technology, matapos siyang sumuko sa National Bureau of Investigation (NBI) noong Linggo, Setyembre 22.
Si Alex, kasama ang corporate secretary ng Zun Yuan, ay sumuko matapos ang raid sa dalawang POGO companies sa Bamban.
Ayon sa kanila, ang tunay na negosyo nila ay buy and sell ng mga sasakyan, ngunit noong 2023, inalok sila ng staff ni Guo ng P20,000 at buwanang dibidendo kapalit ng pagpapahiram ng kanilang pangalan bilang mga incorporators ng POGO.
Matapos ang raid, ipinatawag sila ng NBI, House of Representatives, at Senate noong Mayo. Subalit, sinabihan umano sila na huwag makipagtulungan sa mga awtoridad at huwag magsalita dahil lalabanan nila ang kaso.
Inilahad din ni Alex na nang tumindi ang Senate hearing laban kay Guo, binigyan sila ng pera at pinagtago. “Binigyan kami ng pera para lumipat ng bahay,” sabi niya, idinagdag pa na nakatanggap siya ng P500,000 mula kay Jeremy Santos, staff ni Guo.