Naghihintay na ang Philippine National Police (PNP) ng pag-isyu ng arrest warrants laban sa gaming tycoon na si Charlie “Atong” Ang at iba pang akusado, kasunod ng paghahain ng mga kasong may kaugnayan sa pagkawala ng mga sabungero noong 2022, ayon kay Interior Secretary Jonvic Remulla.
Ayon kay Remulla, may apat na magkakahiwalay na kaso na isinampa laban kay Ang sa iba’t ibang regional trial courts, kabilang ang Lipa City, Batangas at Sta. Cruz at San Pablo City sa Laguna. Saklaw ng mga kaso ang 10 counts ng kidnapping with homicide at 16 counts ng kidnapping at serious illegal detention.
Nilinaw ng kalihim na hindi kasama si Gretchen Barretto sa listahan ng mga akusado. “Kung aling korte ang unang maglalabas ng warrant, may basehan na kami para arestuhin siya,” ani Remulla, na nagsabing itinuturing na armed and dangerous si Ang dahil sa umano’y may armadong security detail at rekord ng sapilitang pagkawala ng mga biktima.
Iginiit din ni Remulla na magiging maayos ang pag-aresto at walang mangyayaring extra-judicial killing, at umaasa siyang mailalabas ang mga warrant bago mag-Pasko.
Ayon naman sa Department of Justice (DOJ), nasa kamay na ng mga korte ang desisyon kung may probable cause para sa pag-isyu ng warrant. Batay sa DOJ resolution noong Disyembre 9, may prima facie evidence umano laban kay Ang at sa iba pang akusado, kabilang ang ilang pulis.
Umingay ang kaso matapos ituro ng whistleblower na si Julie “Don-Don” Patidongan si Ang bilang umano’y utak sa pagkawala at pagpatay sa mahigit 100 sabungero. Ayon kay Patidongan, pinaghinalaang nandaya ang mga biktima at sinakal bago itapon ang mga bangkay sa Lawa ng Taal.