Binigyang-diin ni PNP Chief Gen. Nicolas Torre III kahapon ang kahalagahan ng mental health awareness habang ibinunyag ang pagtaas ng bilang ng mga kaso ng pagpapakamatay sa bansa. Mula Enero hanggang Hunyo 2025, umabot sa halos 2,000 ang mga Pilipinong nagpakamatay.
Ayon kay Torre, marami sa mga kaso ay may kinalaman sa pisikal at online bullying. “Noong panahon ko bilang hepe ng Quezon City Police District, may buwan na may 15 taong nagpakamatay—isang kaso kada dalawang araw,” ani niya sa isang press briefing sa Camp Crame.
Bukod sa tradisyunal na emergency response, sinabi ni Torre na maaaring tawagan ang unified 911 emergency system para sa mga taong nangangailangan ng mental health support. “Kapag tumawag kayo sa 911, pindutin ang apat para makausap ang mga eksperto sa mental health,” paliwanag niya.
Iniutos din niya sa Anti-Cybercrime Group ng PNP na imbestigahan ang dami ng bullying cases sa online na mundo.
Sa isang bahagi ng pahayag, inalala ni Torre ang kanyang karanasan bilang biktima ng bullying mula kay Acting Davao City Mayor Sebastian “Baste” Duterte, na tinawag siyang unggoy sa isang podcast. Matindi ang panawagan ni Torre laban sa ganitong pagtrato: “Tayo ay Pilipino, tayo ay tao. Hindi puwedeng tawaging unggoy.”
Matapos tanggapin ang hamon ni Duterte para sa isang boxing match na may mga kondisyon, hindi naman sumipot si Duterte sa charity bout sa Rizal Memorial Coliseum, kung saan nakalikom ng higit P16.3 milyon para sa mga nasalanta ng bagyo.
Pinapurihan ng Department of Social Welfare and Development (DSWD) si Torre sa kanyang donasyon. Ayon kay DSWD spokesperson Irene Dumlao, malaking tulong ito sa mga pamilyang naapektuhan ng matinding ulan at pagbaha. Ang pondo ay ia-turn over ng DSWD ngayong linggo, dagdag pa niya.
Sa kasalukuyan, nagbibigay na ang DSWD ng P293 milyong ayuda para sa mga pamilyang lumikas dahil sa kalamidad.