Nagpaigting ang Philippine National Police (PNP) ng mga patrol at seguridad sa mga barangay at tirahan bilang paghahanda sa paggunita ng Undas (All Saints’ at All Souls’ Days).
Ayon kay acting PNP chief Lt. Gen. Jose Melencio Nartatez Jr., nakikipagtulungan ang PNP sa mga local government units (LGUs) at barangay officials upang maiwasan ang nakawan at iba pang krimen habang maraming mamamayan ang bumibisita sa sementeryo.
“Siguraduhing maayos na nakasara at ligtas ang mga bahay bago umalis,” paalala ni Nartatez.
Mahigit 31,200 pulis ang ide-deploy sa 5,065 sementeryo, memorial park, at columbarium mula Oktubre 29 hanggang Nobyembre 3. Tutulong din ang 11,700 personnel mula sa AFP, BFP, at Philippine Coast Guard, pati na ang 29,900 force multipliers gaya ng mga barangay tanod, radio groups, at NGO volunteers.
Sa Maynila, ipatutupad ang road closures at traffic rerouting mula Oktubre 30 hanggang Nobyembre 3 upang mapanatiling maayos ang daloy ng trapiko sa mga sementeryo.
Samantala, naka-heightened alert na rin ang mga paliparan dahil inaasahan ang pagdagsa ng mga biyahero ngayong Undas. Ayon sa Civil Aviation Authority of the Philippines (CAAP), nakikipag-ugnayan sila sa mga airline at awtoridad upang matiyak ang maayos at ligtas na biyahe ng mga pasahero.
Sa Ninoy Aquino International Airport (NAIA), naghahanda ang New NAIA Infrastructure Corp. (NNIC) at Manila International Airport Authority (MIAA) ng mga emergency booths, dahil tinatayang aabot sa 1.3 milyong pasahero ang daraan sa mga paliparan mula Oktubre 27 hanggang Nobyembre 5.
Naglagay din ang Department of Health (DOH) ng humigit-kumulang 20 health emergency response teams sa mga malalaking sementeryo sa Metro Manila upang magbigay ng medikal na tulong sa mga bumibisita.
Layunin ng mga hakbang na ito na matiyak ang ligtas, maayos, at mapayapang paggunita ng Undas sa buong bansa.