Naghahanda ang Philippine National Police (PNP) na mag-deploy ng mahigit 50,000 pulis sa buong bansa para tiyakin ang seguridad sa mga nakatakdang kilos-protesta sa Setyembre 21.
Ayon kay PNP Chief Lt. Gen. Jose Melencio Nartatez Jr., pangunahing tungkulin ng kapulisan ang protektahan ang buhay at ari-arian, habang nirerespeto ang karapatan ng publiko na magpahayag nang mapayapa. “Handa at sinanay ang aming mga tauhan upang matiyak na magiging ligtas at maayos ang mga protesta,” aniya.
Dagdag pa ni PNP Spokesperson Col. Randulf Tuaño, ipatutupad pa rin ang maximum tolerance upang mapanatili ang kaayusan. “Makikita at mararamdaman ang presensya ng pulis sa buong bansa, handang tumugon para maging maayos at ligtas ang bawat pagtitipon,” sabi niya.
Batay sa plano ng PNP, kabilang sa deployment ang:
- 10,000 pulis sa mga visibility posts
- 17,000 para sa mobile patrols
- 3,000 sa traffic assistance
- 9,000 sa checkpoints at border control
Bukod dito, halos 6,000 pulis ang naka-standby para sa crowd management, kabilang ang 4,500 Rapid Special Security Force at 415 drone operators para sa monitoring.
Layunin ng PNP na masiguro ang maayos na daloy ng trapiko at normal na takbo ng araw-araw na gawain habang ginaganap ang mga protesta.