Matapos ang kanyang matagumpay na panalo sa The International Series Philippines, ipinakita muli ni Miguel Tabuena ang kanyang galing matapos magtapos sa ika-21 puwesto sa prestihiyosong Link Hong Kong Open na ginanap sa Hong Kong Golf Club.
Sa huling round, nagtala si Tabuena ng three-under 67, salamat sa clutch birdies sa huling dalawang butas na bumawi sa sunod na bogeys sa ika-13 at ika-14 na butas. Sa kabuuan, nagtapos siya ng 14-under 266 matapos ang consistent na rounds na 66, 67, at 66 sa unang tatlong araw ng torneo.
Dahil dito, kumita siya ng $20,600 o humigit-kumulang ₱1.2 milyon. Ang solidong performance na ito ay magpapatibay pa sa kanyang tsansang manguna sa International Series rankings bago matapos ang taon, na maaaring magbigay sa kanya ng puwang sa prestihiyosong LIV Golf sa susunod na season.