Pinatunayan nina South Korean singer Daewon Lee at Filipina singer-actress Aubrey Caraan na walang hangganan ang musika sa kanilang bagong duet na “Selfish Guy,” ang unang kolaborasyon ng Viva Communications Inc. at Milagro Korea.
Tampok sa kanta ang halo ng Korean at Tagalog lyrics, kung saan parehong natutong bigkasin ng dalawa ang wika ng isa’t isa. Ibinahagi ni Aubrey na tinuruan siya ng tamang pagbigkas ng Korean words noong araw ng recording, habang pinuri naman niya si Daewon sa husay nitong mag-Tagalog kahit ilang araw lang nag-praktis.
“Hands-on siya sa recording — tinutulungan niya akong maitama ang mga teknik kasi kanta niya ‘yun. Ang dami kong natutunan,” ani Aubrey. Si Daewon naman ay humanga sa boses ni Aubrey at tinawag siyang “amazing and beautiful,” sabay sabing malaking karangalan na makatrabaho siya.
Ang “Selfish Guy” ay isinulat mismo ni Daewon batay sa kanyang karanasan—tungkol ito sa isang lalaking naghangad ng tagumpay ngunit nawalan ng pag-ibig sa proseso, at kalauna’y nagsisi.
Bukod sa pagiging singer, si Daewon ay dating miyembro ng K-pop group na OFFROAD at isang undefeated MMA fighter. Si Aubrey naman ay nakilala sa Viva One series na “Avenues of the Diamond” at nagsimula sa showbiz bilang miyembro ng Pop Girls.
Ang “Selfish Guy” ay available na ngayon sa lahat ng major music streaming platforms.