Nananawagan ang Philippine Chamber of Commerce and Industry (PCCI) sa PhilHealth na iwasan ang taas ng kontribusyon at i-update ang health benefits ng mga miyembro. Ayon kay PCCI president Enunina Mangio, kahit na may surplus na pondo ang PhilHealth, kulang pa rin ang benepisyo sa mga miyembro, na patuloy na binubuhat ang karamihan ng kanilang gastusin sa ospital.
May netong kita na P173.46 bilyon ang PhilHealth noong 2023, pero ayon sa PCCI, ang financial assistance ng ahensya ay hindi pa rin sapat. “Dapat ang mga kontribusyon na ito ay ibalik sa mga miyembro sa anyo ng mas mataas na benepisyo, kasama ang mas maraming sakop na sakit,” sabi ni Mangio.
Bagamat sinabing tataasan ng PhilHealth ang mga benepisyo ng karagdagang 30% bago matapos ang taon, hiniling pa rin ng PCCI na suspindihin ang pagtaas ng kontribusyon. “May sapat na pondo ang PhilHealth, hindi na kailangan ang rate hike para mapanatili ang operasyon nito, kundi mas magandang pamamahala ng pondo,” dagdag ni Mangio.