Ang bagong kanta “Die with a Smile” ay isang nakakagulat na duet mula kina Lady Gaga at Bruno Mars, at ito ay sobrang ganda. Sa credits ng kanta, kasama sina Dernst “D Mile” Emile II at Andrew Watt sa pagsulat at production, pati na rin si James Fauntleroy para sa karagdagang lyrics. Ang linya ng kanta na “If the world was ending, I’d wanna be next to you” ay nagpa-curious kung sino sa kanila ang nag-isip ng ganitong nakakabasag-pusong linya.
Ayon sa kwento, inimbitahan ni Bruno si Gaga sa studio para pakinggan ang bagong kanta niya. Dumating si Gaga, nakinig, nadala sa kanta, at nag-umpisang magsulat at umawit kasama si Bruno. Natapos nila ang recording ng Die with a Smile sa gabing iyon.
Ang kanta ay tungkol sa mga magkasintahan na handang harapin ang anumang trahedya, kahit ang katapusan ng mundo, basta’t magkasama sila. Tunog trahedya, pero sobrang romantic din. Ibang klase ang sentimentong ito, at ang saya na marinig ito mula kina Bruno at Gaga.
Ang Die with a Smile ay isang standalone single mula sa dalawang tanyag na artists, at maraming nagwi-wish na masundan pa ito. Pop na may halong soul, rock, at R&B ang tunog nito, at parang bumabalik sa magagandang duet noong ‘80s, tulad ng Almost Paradise mula sa Footloose. May retro country vibe din ang video nito. No. 1 na ito sa maraming bansa, kasama ang Pilipinas. Malamang na mag-aani ito ng Grammy Awards.
Bukod sa duet na ito, ang tunog na kinababaliwan ng Spotify listeners ngayon ay ang musika ni Sabrina Carpenter. Ang kanyang mga kanta ay nagbibigay ng feel-good vibes, at apat sa kanyang mga single, kasama ang Espresso, ay nasa Top 25.