Kinilig ang fans nang makita si Park Min Young na naka-flight attendant uniform habang nagfi-film ng kanyang bagong K-drama na “Confidence Queen” sa Clark International Airport. Kasama niya sa eksena si Joo Jong-hyuk, na gumanap din sa hit na “Extraordinary Attorney Woo.”
Ang “Confidence Queen”, na adaptasyon ng Japanese film na “Confidence Man”, ay palabas ngayon sa Prime Video. Kasama rin sa cast si Park Hee-soon, na gumaganap bilang James at kumukumpleto sa trio ng con artists na tinatawag na Team Confidence Man.
Ayon kay Min Young, exciting para sa kanya ang role dahil bawat episode ay may bagong karakter siyang ginagampanan. Dagdag pa niya, mas naging interesting ang Korean version dahil mas nabigyang-buhay ang backstory ng kanyang karakter na si Yi-rang, pati na ang ugnayan nito kina James at Gu-ho (Jong-hyuk).
Ibinahagi rin ni Jong-hyuk ang tuwa niya na makabalik sa Pilipinas, matapos niyang mag-aral dito noon. Habang si Hee-soon naman ay inamin na rookie pa siya sa K-drama format kaya humihiling ng suporta mula sa mga manonood.
Para sa mga Pinoy fans, may espesyal na mensahe si Min Young: “Maraming salamat sa suporta! Dahil may mga eksenang kinunan dito sa Pilipinas, sana mas ma-enjoy n’yo ito.”