Nagsimula ng malakas si Aira Villegas ng Team Philippines sa kanyang bid para sa medalya sa women’s 50kg boxing tournament sa Paris Olympics. Sa kanyang unang laban noong Lunes, pinataob ni Villegas ang Moroccan na si Yasmine Mouttaki sa pamamagitan ng unanimous decision (5-0) sa Round of 32 sa North Paris Arena sa France.
Sa panalong ito, kailangan na lang ni Villegas, na taga-Tacloban City, ng dalawang panalo pa para makasiguro ng bronze medal. Ang 28-anyos na boksingera ay haharap sa matinding pagsubok laban sa Algeria’s Roumaysa Boualam, na ikalawa sa seedings ng torneo.
Aasahan ni Villegas na maabot ang quarterfinals sa Biyernes ng alas-dos ng umaga sa kanyang unang Olympic appearance.
Samantala, makikipagsapalaran din si Nesthy Petecio, na nanalo ng silver sa Tokyo, sa kanyang debut sa Paris Games ngayong Martes ng gabi, alas-11:54, laban kay Jaismine ng Indonesia sa 57kg round of 32.
Tatlong iba pang Filipino boxers na kinabibilangan ng Tokyo Games medalists na sina Eumir Marcial at Carlo Paalam, ay magsisimula ng kanilang kampanya sa Miyerkules.
Si Marcial ay makakaharap si Turabek Khabibullaev ng Uzbekistan sa men’s 80kg round of 16 ng alas-3:04 ng umaga, habang si Paalam ay makikipaglaban kay Jude Gallagher ng Ireland sa men’s 57kg round of 16 ng alas-9:30 ng gabi.
Ang iba pang kasapi ng PH boxing team sa Paris ay si Hergie Bacyadan, na makikipagsapalaran din sa Miyerkules sa women’s 75kg round of 16 laban kay Li Qian ng China ng alas-6:04 ng gabi.