Nanawagan si Pope Leo XIV ng isang pandaigdigang tigil-putukan sa Araw ng Pasko, bilang paggalang sa kapanganakan ni Hesukristo at upang mabigyan ang mundo ng kahit 24 oras na kapayapaan.
Sa panayam sa kanyang tirahan sa Castel Gandolfo malapit sa Roma, inihayag ng Santo Papa ang kanyang matinding kalungkutan matapos umanong tanggihan ng Russia ang panukalang Christmas truce. Ayon sa kanya, umaasa siyang makikinig ang lahat ng panig at igagalang ang isang araw ng katahimikan sa gitna ng mga digmaan.
Patuloy pa rin ang labanan sa Ukraine, kung saan umatras ang ilang tropa sa silangan ng bansa habang may mga sibilyang nasawi at libo-libong nawalan ng kuryente dahil sa walang tigil na pag-atake sa gitna ng taglamig. Wala rin pang malinaw na senyales ng kasunduan matapos ang hiwalay na pakikipag-usap ng mga negosyador ng Russia at Ukraine sa mga opisyal ng Estados Unidos.
Kamakailan ay nakipagpulong din si Pope Leo kay Ukrainian President Volodymyr Zelensky at sinabing bukas siya sa posibilidad na bumisita sa Ukraine sa hinaharap, bagama’t hindi pa tiyak kung kailan. Binigyang-diin din niya na mahalaga ang papel ng Europa sa diplomasya at nagbabala na ang anumang plano para sa kapayapaan na walang sapat na koordinasyon ay maaaring magdulot ng malaking pagbabago sa ugnayan ng mga bansa.
Sa gitna ng patuloy na tensyon, muling iginiit ng Santo Papa ang kanyang panawagan: isang Paskong may kapayapaan para sa buong mundo.