Idineklara ng International Boxing Association (IBA) si Manny Pacquiao bilang bagong vice president ng organisasyon, ayon sa anunsyo nitong Lunes. Ang IBA, dating kilala bilang AIBA, ay dating nangangasiwa sa boxing sa Olympics bago ito tanggalin ng International Olympic Committee (IOC) noong 2021 dahil sa isyu sa pamamahala at katiwalian.
Makakatrabaho ng 46-anyos na dating walong-division world champion si Umar Kremlev, ang kasalukuyang pangulo ng IBA, upang itaguyod ang mga programang nakatuon sa kapakanan ng mga atleta at palawakin ang mga oportunidad sa boxing.
Sa pahayag na inilabas ng IBA matapos ang pagpupulong sa Maynila, pinuri ni Pacquiao ang pamumuno ni Kremlev at tinawag ang kasalukuyang yugto ng IBA bilang “Golden Era” ng boxing.
“Pangarap ko na walang batang boksingero ang mapag-iiwanan, walang kampeon ang makakalimutan, at walang bansa ang maiiwan,” ani Pacquiao.
Dagdag pa niya, layunin niyang magsilbing tulay sa pagitan ng amateur at professional boxing, at magtaguyod ng pagkakaisa sa pagitan ng iba’t ibang bansa at henerasyon.
Mula sa pagiging batang nagtitinda sa kalsada hanggang sa pagiging isa sa mga pinakamahusay na boksingero sa kasaysayan, patuloy na pinalalawak ni Pacquiao ang kanyang impluwensya — ngayon, sa pandaigdigang larangan ng sports governance.