Upang pigilan ang pagtaas ng presyo ngayong Kapaskuhan, ipinatupad na ng Department of Agriculture (DA) ang P120/kilo suggested retail price (SRP) para sa pulang at puting sibuyas simula ngayon.
Ayon kay Agriculture Secretary Francisco Tiu Laurel Jr., kailangan ang price cap matapos umabot sa P300 hanggang halos P400 ang bentahan ng sibuyas sa ilang pamilihan. Bagama’t may pagkaantala sa pagdating ng imported onions na nagdulot ng paninikip sa suplay, iginiit niyang hindi ito dahilan para sa “sobrang taas” na presyo. Sa kasalukuyan, nasa P60/kilo lamang ang halaga ng imported onions, kaya posible pa rin umano ang makatwirang tubo sa ilalim ng P120 SRP.
Kasabay nito, mananatili rin hanggang Disyembre 31 ang rice import moratorium, na naglalayong protektahan ang lokal na magsasaka at patatagin ang presyo ng palay, alinsunod sa direktiba ng Pangulo.
Nagbabala rin ang DA laban sa mga scam na nag-aalok ng umano’y maagang rice import privileges. Ayon kay Tiu Laurel, may mga nagkakalat ng pekeng solicitation forms sa Cebu na gumagamit pa ng opisyal-sounding language upang makahikayat ng rice millers at traders.
“Fake news, scam ito,” diin ng kalihim, sabay pahayag na tinutugis na ng mga awtoridad ang nasa likod ng modus. Hinikayat naman ng DA ang industriya na maging mapagmatyag at agad i-report ang anumang kahina-hinalang alok.