Nagbitiw na si Olivia Yacé ng Cote d’Ivoire bilang Miss Universe Africa & Oceania 2025, ilang araw matapos siyang magtapos bilang 4th runner-up sa coronation night sa Bangkok, Thailand kung saan itinanghal si Fatima Bosch ng Mexico bilang bagong Miss Universe.
Sa isang bukas at emosyonal na pahayag sa social media, sinabi ni Yacé na ang kanyang desisyon ay nakaugat sa pagpapanatili ng kanyang mga pangunahing prinsipyo—respeto, dignidad, kahusayan, at equal opportunity.
Ayon sa kanya, bagama’t maraming hamon ang pinagdaanan niya sa pageant, nanindigan siyang kailangan niyang maging tapat sa sarili:
“With a heart full of gratitude… I hereby announce my resignation from the title of Miss Universe Africa and Oceania.”
Ipinunto ng beauty queen na nagsilbi siya nang buong puso bilang ambassador, at naniniwala siyang kailangan niyang manatiling nakatuon sa mga pinanghahawakang prinsipyo upang ganap na maabot ang kanyang potensyal. Muli rin niyang binigyang-diin ang mensaheng ibinahagi niya sa Q&A: ang pagtaguyod sa mga kabataang babae na lakasan ang loob, pasukin ang mga espasyong tila hindi para sa kanila, at magningning.
Sa kanyang mensahe, nanawagan din si Yacé sa Black, African, Caribbean, American, at lahat ng Afro-descent communities na patuloy na pumasok at lumaban sa mga espasyong hindi inaasahan ang kanilang presensya.
“Our presence matters, and our voices must be heard,” aniya.
Nagpaabot siya ng pagbati sa bagong Miss Universe at ng pagdasal sa mabilis na paggaling ni Miss Jamaica Gabrielle Henry, na kasalukuyang nasa ICU matapos ang aksidente sa preliminaries.
Kasabay nito, kinumpirma rin ng Miss Cote d’Ivoire Committee (COMICI) ang kanyang pagbibitiw at inihayag na ibabalik ni Yacé ang kanyang sash bilang pormal na pagtalima sa desisyon.
Kasama ni Yacé sa grupo ng continental queens sina Julia Ann Cluett ng Malta (Europe & Middle East), Zhaona Zena ng China (Asia), at Stephany Abasali ng Venezuela (Americas).