Masuwerte ang mga Pinoy fans ni Olivia Rodrigo dahil dadalhin ng Filipino-American pop star ang kanyang “GUTS” world tour sa Pilipinas!
Inanunsyo ng Live Nation Philippines na gaganapin ang kauna-unahang concert ni Olivia sa bansa sa Oct. 5 sa Philippine Arena, Bulacan. Ang mas exciting pa rito, lahat ng tickets ay ibebenta sa flat rate na P1,500 (kasama na ang buwis), kaya’t abot-kayang mapapanood ng fans ang kanilang paboritong singer.
Magbubukas ang ticket sales ngayong Sabado, Sept. 14, alas-10 ng umaga, at maaaring bumili ng hanggang apat na tickets bawat transaksyon. Lahat ng tickets ay “Silver Star Tickets,” at malalaman lamang ang seat locations kapag kinuha na ang tickets matapos ang Sept. 28.
Ang sections ay ia-assign nang random, mula sa floor seats hanggang sa limited-view at upper-level sections, kaya lahat ng fans ay may patas na tsansa na makakuha ng magandang puwesto.
Ang event na ito ay mas lalong nagiging espesyal dahil ang net proceeds mula sa ticket sales ay mapupunta sa “Fund 4 Good” ni Olivia—isang global initiative na sumusuporta sa mga nonprofit organizations na tumutulong sa mga kababaihan at kabataan, kabilang ang edukasyon, reproductive rights, at pag-iwas sa gender-based violence.